A Napoli, “Waiting for life – Spetan la vita”


 

La Usc di Ladins 02.11.2012

Fassalux e la Risola porta dant n nef projet sui temes de la legalità e de la responsabilità zevila

 
 
La coridora Martina Caironi, medaa de òr a la Paralimpiadi 2012.
La coridora Martina Caironi, medaa de òr a la Para... 

Sozietà - “Waiting for life – Spetan la vita”. L’é chest l’inom del projet portà dant da la sociazion Fassalux e dal Pian di joegn de Fascia, la Risola, nasciù con chela de soscedar anter le neve generazion valch pensier e reflescion sui temes de la legalità e del derit, per jir a fon sun costion che revarda la persone e la comunanza, a livel local e nazional.
La scomenzadiva, outa ai joegn de Fascia e Fiem anter i 17 e i 23 egn, la perveit cater scon-trade che vegnarà fat te Fascia fora per l meis de november e n viac de trei dis a Napoli (dai 29 de november al prum de dezember), olache l grop de partezipanc podarà rejonar con persone che scombat contra la mafia e ence vijitar la perjon de Nìsida, scontran chi che laora e vif laìte.
Apede chest, se sà ben, se arà l met de veder na zità curiousa e enteressanta descheche l’é l maor zenter de la Campania e de jir a descorir posć riches de storia e de beleza, coche l’é Pompei, Ercolan e l Vesuvio. 
Dalaìte del projet, personajes de nonzech vegnarà te Fascia per portar soa testimonianza, aldò de esperienze de vita particolare e forte. Ruarà la fisica Sara Valentinetti, enrescidora al CERN de Ginevra, che rejonarà de soa vita de femena de scienza e de chel che l’é stat descorì ti laboratories svizeres ti ùltimes egn. Con ela se refletarà sul conzet de “lim”, te l’enrescir desche tel viver. Te Fascia vegnarà ence la venjidora de la medaa de òr a le Paralimpiadi de Londra 2012 te la garejada di 100 metres de atletica, la coridora Martina Caironi, che dò n grief azident olache l’à perdù dute doi le ame, l’à sapù renascer e con gaissa e forza ruar a taar endodanef traverc emportanc tel sport e te la vita. 
N program pien, che pel segur far più riches chi che vel tor part al projet.
L cost de partezipazion (scontrade + viac) l’é de 80 €. Per maor info e per se enscinuar se pel jir sul sit www.fassalux.it o su www.larisola.com, da olache se pel desćiarear l modulo da scriver ite, da consegnar al sportel del Comun General o da manar per fax al numer 0462 760949. 
Se pea via jà insnet, vender 2 de november te la sala grana de la Sorastanza de la Scola de Fascia a Poza da les 20.30 con la pruma scontrèda.
Spetar la vita: l’é chel che fosc ge sozet a chi che, serà via, vita somea no n'aer più. Cognoscer la realtà de na prejon segur pel esser moment de crescimonia, per se mever fora e per no seghitar a spetar... Esser ledech vel dir poder aer n muion de deric e de ocajion, ma tel medemo temp porta doeres e responsabilità. Tol sù chesta ocajion! No spetar la vita... La vita te speta te!

(tz)