DNA-GUST de la LUM 2012

Che speteste? Gei ence tu al Dna-Gust de la Lum!

Amò pec dis per se scriver ite a la scomenzadiva de animazion da d’istà per joegn fascegn

Rua endò l Gust!

Ai 31 de mé se sera sù la enscinuazions per la neva edizion 2012 de la scomenzadiva de animazion per l’istà, outa ai joegn
anter i 13 e i 16 egn de la Val (da la clas seconda de la scola mesèna fin la seconda de la scola auta), proponeta da la sociazion Fassalux e
sostegnuda da duc i Comuns de Fascia.
Dai 23 de messèl enscin ai 31 de aost, con desvaliva ativitèdes dal lunesc al vender, da les 8.30 dal doman fin les 16.30 domesdì, ge vegnarà proponet ai bec n program amò n’outa originèl, rich e algegher. 
Aló da l’oratorie de Poza, vegnarà dì per dì endrezà momenc de jech, de stèr ensema, de festa; se sà ben, da spes se jirà stroz, sa mont, ti ciantons più carateristics, a descorir i posć più bie e curiousc de noscia valèda. Ogne dì sarà n grop che cojinarà, che netarà sù, che lavarà jù, per emparèr mìngol i mestieres de cèsa e soraldut a se meter a la leta di etres.

Chest an a la scomenzadiva ge vegnarà dat n tai “biologich”, su la valorisazion del corp, con setemènes a tema olache ogne bez  podarà se vardèr mìngol miec, daìte e de fora. Muscoi, cher, polmons, cervel, eies, mans...
Marevees che besegna cognoscer, percheche se les posse aprijièr e respetèr.

Maora informazions sul sit www.fassalux.it o per telefon al numer 3313704984.

Dò l gran e pojitif ejit di doi egn passé, speton endò n bel numer de enscinué, per ruèr a tastèr endodanef duc ensema l’ensaorì
e piajegol “Dna-Gust de la Lum”! Te speton!

Iscrizione Gust Lum 2012.pdf