La sociazion Fassa Lux enstadì te Sorastanza l’à premià i studenc de la scoles autes de Fascia che i à tout pèrt a n concors su l’èga


Concorsc - No i podea che maraveèr. Amò n’outa i joegn de Fassa Lux i à lascià n segn.

Ai 2 de otober del 2010 la sociazion l’aea endrezà sun Ciampedìe n convegn su l’èga dal tìtol “É seit per piajer” olache se aea binà raprejentanc politics, professores universitères e studiousc de l’èga. Da chest convegn l’era pontà via ence n concors, semper con tem l’èga, out ai joegn de la scola autes. Vèlch clas de Liceo e Scola d’èrt de Fascia à dezidù de tor pèrt e via per dut invern i studenc à lurà per portèr inant chel che l concors domanèa: fèr na enrescida scientifica su l’èga al Liceo e fèr n storyboard a l’IsA.

A tor pert al concors l’é stat la 5^LSB e la 4^LSA del Scientifich, che les à portà dant n studie de la composizion de l’èga de la Veisc e la 3^A de la Scola d’èrt, che i à portà dant 3 storyboard, e duc se à binà te sala grana de la Sorastanza en mercol prum de jugn per la premiazion del concors.
Dut scur, ciandeiles empeèdes, musega de efet che vegnìa fora dai box, na sfilza de pegnates de vierech e duc i componenc de Fassa Lux un apede l’auter. La premiazion del concors l’é stat n moment deldut desferent e de gran efet. I studenc i à tout pèrt a na premiazion spezièla, rencurèda te ogne particolèr e che con chest l’à segur valorisà sie empegn.
La sociazion Fassa Lux sun paladina l’à rengrazià la Sorastanta Mirella Florian, i professores e chi che se à dat ju per chest concors: la professora Bottarin de l’Eurac (European Academy) de Busan che à vidà i studenc del liceo, e i prof. Lara Steffe, Paolo Giovanni Artale, Thomas Zulian e Claus Sorapera.
La sociazion à pissà de fèr valutèr i lurieres da jurìes spezièles: per la enrescides su l’èga fates da la doi classes del Liceo l’é stat tout ite doi dirigenc de la Provinzia de Trent che se cruzia de energìa idroeletrica e de clima e microclima a l’Agenzia Provinzièla Protezion Ambient. Per i lurieres de la scola d’èrt enveze l’é stat chiamà i artisć Alberto Detomas e Maurizio Tomè, e Fabio Pegoretti de l’Arti Grafiche de Ciavaleis.
Eleonora Finazzer per la 5^LSB e Erika Planchensteiner per la 4^LSA les à portà dant l lurier fat da la doi classes e la Sorastanta à avert la soracuerta manèda su da Trent dai sorastanc de l’APPA. A venjer n assegn de 500 euro l’é stat la 4^LSA. Sie lurier vegnarà publicà su la revista de l’Eurac e ence sun n numer che vegn de La Usc di Ladins.
I bec de la Scola d’èrt te si dessegnes i à cernù de atualisèr l descors de l’èga e duta trei la stories portèdes dant les aea desche argoment la privatisazion de l’èga. A premièr l lurier de duc i studenc sun paladina l’é stat l’artist Alberto Detomas. L lurier venjidor l doventarà na reclam manèda fora sui canai tematics de la provinzia de Trent e ence ic à ciapà l pest de 500 euro.
La clas 5^LSB aboncont é stata premièda per sie empegn con na zedola de 10 euro per om da spener a l’Eurospin.

La Sorastanta Mirella Florian amò n’outa l’à rengrazià la sociazion Fassa Lux per aer portà dant chest concors e a dut l
publich de studenc la ge à dit proprio de emparèr da la sociazion Fassa Lux che apede a la cognoscenza scientifica e artistica i à dat na lezion de vita. “É seit per piajer” vel dir “aer seit” de cognoscenza e de saer per jir inant te la vita de duc i dis con maor gaissa e motivazion, per se didèr enstesc a passèr fora chel “bosch fosch” che se troon tedant ogne tant te la vita.

(vr)